အာဆင်နယ် ဂန္တဝင်ကြီး သီယာရီ အွန်နရီကတော့ လက်ရှိ အာဆင်နယ် အသင်းမှာ သူတွဲကစားလိုတဲ့ ကစားသမား တစ်ဦးက ဂျေးဆုဖြစ်တယ်လို့ ထုတ်ပြောလာပါတယ်။
ဂျေးဆုဟာ လက်ရှိ အာဆင်နယ်အသင်းရဲ့ အကောင်းဆုံး အထောင်တိုက်စစ်မှူး ဖြစ်ပြီး သူ့ရဲ့ ဂိုးသွင်းနှုန်း အပေါ်မှာတော့ ဝေဖန်ခံရမှု အချို့ ရှိထားတာပါ။ အဲ့တာကလွဲရင် အသင်းအတွက် ပေးဆပ်နိုင်စွမ်းမှာ သံသယ မရှိကြပါဘူး။
အွန်နရီက “ ရိုးရိုးသားသားပဲ ပြောပါမယ်။ ကျနော်တော့ ဂျေးဆုနဲ့ တွဲကစားရမှာကို သဘောကျပါတယ်။ သူနဲ့တွဲကစားဖူးတဲ့ လူတိုင်းကလည်း ဒီလိုမျိုးတွေပဲ ဖြေပေးမယ်လို့ ကျနော် ထင်ပါတယ်။
သူက တစ်ရာသီ သွင်းဂိုး ၂၅-၃၀ ဂိုးလောက် ရနိုင်မလားတော့ ကျနော် မသိပါဘူး။ သူက တိုက်စစ်အမားအဖြစ် အားလုံးမှာ ကောင်းမွန်တဲ့ ကစားသမားဖြစ်ပါတယ်။
သွင်းဂိုးတွေနဲ့ ပတ်သက်လာရင် အကောင်းဆုံးတော့ မဟုတ်ပေမယ့် သူ့ထံက ဘာတွေကို မျှော်လင့်နိုင်မယ်ဆိုတာနဲ့ အသင်းအတွက် ပွဲအစ ပွဲအဆုံး ပေးဆပ် ကစားမယ့်သူ ဆိုတာကို ကျနော်တို့ သိပါတယ် ” လို့ ဖြေဆိုခဲ့တယ်။
ဂျေးဆုဟာ ဒီအပတ် ဆီးဗီးလာပွဲမှာ ဒဏ်ရာရရှိခဲ့ပြီး ပရီးမီးယားလိဂ်ပွဲမှာ ပါဝင်နိုင်မလား စောင့်ကြည့်ရပါလိမ့်မယ်။