ချယ်ဆီးအသင်းဟာ ဒီနေ့နံနက် အစောပိုင်းမှာ ဒေါ့မွန်အသင်းနဲ့ ခြေစမ်းပွဲ ယှဉ်ပြိုင်ခဲ့ရာ ၁-၁ သရေ ကျခဲ့ပြီး ရာသီကြို ခြေစမ်းပွဲတွေမှာ ရှုံးပွဲ လုံးဝ မရှိသေးတဲ့ ရလဒ်ကို ပိုင်ဆိုင်ခဲ့ပါတယ်။
ပွဲအပြီးမှာတော့ ချယ်ဆီးအသင်းက ရာသီသစ်ကို ယှဉ်ပြိုင်ဖို့ အသင့် ဖြစ်နေပြီလားလို့ မေးခွန်းထုတ်ခံခဲ့ရပြီး နည်းပြ ပိုချက်တီနိုကတော့ ယုံကြည်မှု ရှိရှိနဲ့ တုန့်ပြန်ခဲ့ပါတယ်။
” ကျနော်တို့မှာ လုပ်စရာ တစ်ခုပဲ ရှိပါတယ်။ ရာသီသစ် အတွက် အသင့် ဖြစ်နေဖို့ပဲလေ။ ဒီနေ့ပွဲမှာဆို အသင်းက အတော်လေး ကောင်းကောင်း ကစားသွားတယ်လို့ ကျနော် ထင်တယ်။ ပွဲက ရင်ခုန်စရာပဲ။
ကျနော်တို့ နိုင်တောင် နိုင်ဖို့ ထိုက်တန်ခဲ့တယ်။ ဒါပေမယ့် ဒီအချိန်က ပွဲရလဒ်တွေ အရေးမကြီးသေးတဲ့ ကာလပါ။ ဖီလင် ကောင်းနေဖို့ပဲ လိုတယ်။
ဒီ ဒေါ့မွန်ပွဲကတော့ ကျနေ်ာတို့ အသင်း ဘယ်လို ကစားမလဲ မိနစ် ၉၀ လုံးစာ ကျနော် ခေါင်းထဲကနေ သေချာ ပလန်ဆွဲခဲ့တာ။ ဘာဖြစ်လို့လဲ ဆိုတော့ ဘောလုံးရာသီ စဖို့ကလည်း ၁ဝ ရက်ပဲ လိုတော့တယ်လေ။” လို့ တုန့်ပြန်ခဲ့ပါတယ်။
သတင်းထောက် တစ်ဦးက ချယ်ဆီးဟာ ပရီးမီးယားလိဂ် ဖလား စိန်ခေါ်နိုင်မလား မေးခွန်းထုတ်ခဲ့သေးပြီး ပိုချက်တီနိုက အခုလို ယုံကြည်မှုရှိစွာ ဖြေကြားခဲ့ပါတယ်။
” ကျနော်တို့ ဖလား ယူနိုင်အောင် ကြိုးစားသွားမှာပါ။ ဒါက ရင်ထဲက မပါဘဲ လျှောက်ပြောနေတာ မဟုတ်ဘူး။ ချယ်ဆီးက ပရီးမီးယားလိဂ် ရအောင် ကြိုးစားသွားမှာ။ ဒါက ဖြစ်နိုင်လား မဖြစ်နိုင်လား ရာသီကုန်ရင် ခင်ဗျားတို့လည်း သိရမှာပဲ။ ” လို့ အာဂျင်တိုင်းသား နည်းပြကြီးက ပြောဆိုခဲ့တာ ဖြစ်ပါတယ်။
နည်းပြ ပိုချက်တီနိုရဲ့ ချယ်ဆီးအသင်းဟာ ရာသီအဖွင့်ပွဲအဖြစ် စတမ်းဖိုဒ့်ဘရစ်ချ်မှာ လီဗာပူးအသင်းနဲ့ ရင်ဆိုင်ရမှာပဲ ဖြစ်ပါတယ်။