ဥရောပဘောလုံးအဖွဲ့ချုပ်ဘက်က ၂၀၂၄ ခုနှစ်ကနေ စတင်မယ့် ချန်ပီယံလိဂ် ပြိုင်ပွဲသစ်မှာ အင်္ဂလန် အက်ဖ်အေဖလားကို အနိုင်ရတဲ့ ကလပ်ကိုလည်း ဝင်ခွင့်တစ်နေရာပေးဖို့ ပြင်ဆင်နေပြီဖြစ်ကြောင်း တယ်လီဂရပ်က ဖော်ပြပါတယ်။
မကြာသေးခင်ကပဲ ခုန်ပျံကျော်လွှားစနစ်နဲ့ ချန်ပီယံလိဂ်ဝင်ခွင့်ပေးဖို့ ငြင်းဆန်ခဲ့တဲ့ ယူအီးအက်ဖ်အေဟာ အခြားသော စနစ်သစ်နဲ့အတူ ပရီးမီးယားလိဂ် ကြီး ၆ ကြီးကို ဥရောပဝင်ခွင့် တစ်နေရာတိုးပေးဖို့ ပြင်ဆင်နေတာပါ။ ၎င်းတို့ ရွေးချယ်တဲ့ စနစ်မှာတော့ ဥရောပမှာ သမိုင်းကြောင်းရှိမှုအပေါ် မူတည်တဲ့ ရွေးချယ်မှုမျိုး ပါဝင်လာမှာဖြစ်ပါတယ်။
ချန်ပီယံလိဂ်ပြိုင်ပွဲရဲ့ စနစ်ကို စတင်ချိန်မှာတော့ ပြိုင်ပွဲဝင်ကလပ် ၃၆ သင်းထိ ရှိလာမှာဖြစ်ကာ လက်ရှိ ကျင်းပနေတဲ့ စနစ်နဲ့ဆိုရင် ၄ သင်းထိ ပိုတိုးလာတော့မှာပါ။ ထပ်တိုးဝင်ခွင့် ၄ နေရာထဲက ၂ နေရာကိုတော့ ချန်ပီယံလိဂ်ဝင်ခွင့် မရတဲ့ Uefa co-efficient မြင့်မားတဲ့ ကလပ်တွေအတွက် စဉ်းစားပေးနေတာဖြစ်တယ်။
ဒါပေမယ့်လို့ ကြီး ၆ ကြီး စာရင်းဝင် ကလပ်တွေထဲက တစ်သင်း အနိုင်ရမှ ဝင်ခွင့်ပေးမှာဖြစ်ပြီး ထိပ်သီး ၆ သင်းပြင်ပ ကလပ်တစ်သင်းက အက်ဖ်အေဖလား အနိုင်ရမယ်ဆိုရင်တော့ အဆိုပါ စည်းမျဉ်းက အသုံးဝင်မှာ မဟုတ်ပါဘူး။
ဥပမာအားဖြင့် ဒီရာသီမှာ အက်ဖ်အေဖလား ဆီမီးဖိုင်နယ်ရောက် ကလပ်တွေထဲက မန်စီးတီး၊ လီဗာပူး၊ ချယ်ဆီးတို့ဟာ အက်ဖ်အေဖလားကို အနိုင်ရလို့ ပြည်တွင်းမှာ အဆင့် ၄ ပြင်ပဆိုရင် လာမယ့်ရာသီ ချန်ပီယံလိဂ်င်ခွင့်ရမှာဖြစ်တယ်။ ဒါပေမယ့်လို့ ပဲလေစ့်အသင်း အက်ဖ်အေဖလား အနိုင်ရမယ်ဆိုရင်တော့ ချန်ပီယံလိဂ်ဝင်ခွင့် ရမှာ မဟုတ်ပါဘူး။
အဲ့စနစ် မတိုင်ခင် UEFA coefficient ကို အခြေခံပြီး ခုန်ပျံကျော်လွှားစနစ်နဲ့ ဝင်ခွင့်ပေးရေးမှာက အငြင်းပွားမှုတွေ ရှိထားခဲ့တယ်။ သက်ဆိုင်ရာ အမှတ်ပေးလိဂ်တွေမှာ အဆင့် ၄ ပြင်ပ ကလပ်တွေထဲက တစ်သင်းကို ချန်ပီယံလိဂ်ဝင်ခွင့် ပေးတဲ့အခါ အဆင့် ၆ နေရာက အသင်းက အဆင့် ၅ နေရာက အသင်းထက် UEFA coefficient မြင့်နေရင် စကားပြောစရာ ဖြစ်လာပါလိမ့်မယ်။
ယူအီးအက်ဖ်အေဘက်က ထပ်တိုး ၄ နေရာလုံးကို အသင်းငယ်တွေအတွက် အခွင့်အရေးဖြစ်စေတာထက် မျှမျှတတအားဖြင့် အသင်းကြီးတွေအတွက်လည်း ၂ နေရာစာ ဖန်တီးပေးလိုနေတာဖြစ်တယ်။ စနစ်သစ် မစတင်ခင် ဆွေးနွေးမှုတွေ များစွာ လုပ်ကြဖွယ်ရှိပြီး လာလီဂါ အပါအဝင် အခြားသော ထိပ်သီးလိဂ်တွေ အတွက်လည်း စဉ်းစားပေးမှုတွေ ရှိဦးမှာဖြစ်ပါတယ်။