တိုက်စစ်မှူးဟောင်း ဒီယေဂို ဖော်လန်ဟာ မန်ချက်စတာ ယူနိုက်တက်နဲ့ အက်သလက်တီကို မက်ဒရစ်တို့ရဲ့ ပွဲနဲ့ပတ်သက်ပြီး သူ့ရဲ့ ထင်မြင်ချက်ကို ပြောကြားခဲ့ပါတယ်။
ဥရုဂွေး ဂန္တဝင်ဟာ ကလပ်နှစ်ခုလုံးအတွက် ကစားပေးခဲ့ဖူးတဲ့ တိုက်စစ်သမားဟောင်း ဖြစ်ပါတယ်။ သူ့ရဲ့ ဂိုးသွင်းစွန့်စားခန်းတွေဟာ စပိန်မှာ အကောင်းဆုံး စတင်ခဲ့တာ ဖြစ်ပါတယ်။ အသင်းဟောင်းတွေ ထိပ်တိုက်တွေ့မှုအပေါ် မှတ်ချက်ပေးရာမှာ အေတီကိုတို့ဟာ သရဲနီတွေကြောင့် ခက်ခဲစွာ ရုန်းကန်ရနိုင်တယ်လို့ ထင်မြင်နေတာပါ။
ယူနိုက်တက်ဟာ ဒီညမှာ ဝမ်ဒါမက်ထရိုပိုလီတာနို ကွင်းကိုလာရောက် ကစားရမှာဖြစ်ပေမယ့် လာလီဂါဘီလူးတွေဟာ ခက်ခဲတဲ့ ရာသီကို ကြုံတွေ့ခဲ့ရတာ ဖြစ်ပါတယ်။ ဆီမြွန်နီ လက်အောက်မှာ ဖွင့်ကစားတဲ့ ပုံစံအသစ်ကို ရှာဖွေရင်း အလုပ်မဖြစ်ဘဲ သူတို့ရဲ့ တောင့်တင်းတဲ့ အကြမ်းခံနိုင်စွမ်းက ပျက်ဆီးသွားခဲ့ရတာပါ။
လိဒ်စ်နဲ့ ဘရိုက်တန်တို့နဲ့ နောက်ဆုံးပွဲတွေမှာ အနိုင်ရခဲ့တဲ့ ယူနိုက်တက်ဟာ အက်သလက်တီကို မက်ဒရစ်ရဲ့ ယိုပေါက်တွေကို ရှာတွေ့ပြီး အသုံးချနိုင်လိမ့်မယ်လို့ ဖော်လန်က ယူဆထားပါတယ်။
“ မန်ချက်စတာ ယူနိုက်တက်မှာ အရှိန်အဟုန်၊ လျင်မြန်မှုနဲ့ တစ်ယောက်ချင်း ရင်ဆိုင်ရတာ ကြိုက်တဲ့ ကစားသမားတွေ ရှိပါတယ်။ အက်သလက်တီကို မက်ဒရစ်က အခုချိန်မှာ သူတို့ရဲ့ အကောင်းဆုံး အနေအထားမှာ ရှိမနေတာကြောင့် တန်ပြန်တိုက်စစ်တွေကို စိုးရိမ်ရပါလိမ့်မယ်။
ယူနိုက်တက်တို့ နေရာလွတ်နဲ့ ပြေးလွှားစရာ ဟာကွက်တွေ ရှာတွေ့သွားရင်တော့ အေတီကိုအတွက် ခက်ခဲတဲ့အချိန်တွေ ဖြစ်သွားနိုင်ပါတယ်။ အေတီကိုက ပွဲကို အနိုင်ရနိုင်မယ့် အခွင့်အရေးကောင်းရဖို့ သူတို့ရဲ့ လမ်းကြောင်းတွေကို အတူတကွ စုစည်း ထိန်းသိမ်းသွားလိမ့်မယ်။ ဒါက နှစ်ဖက်နည်းပြတွေအတွက် စစ်တုရင် ပွဲကောင်းတစ်ပွဲ ဖြစ်မှာပါ ” လို့ ဖော်လန်က ပြောဆိုခဲ့ပါတယ်။
အက်သလက်တီကို မက်ဒရစ်ဟာ မနှစ်က လာလီဂါ ဖလားရခဲ့ပြီနောက် ဒီနှစ်မှာ အဆင့် ၅ နေရာမှာ ရှိနေပြီး သူတို့ရဲ့ ခံစစ်မှတ်တမ်းက စိုးရိမ်စရာ ကောင်းခဲ့ပါတယ်။ ဥရောပရဲ့ အကောင်းဆုံး ဂိုးသမားဖြစ်ခဲ့တဲ့ အော့ဘလက်ဟာ ဒီရာသိမှာ အံ့ဩဖို့ကောင်းအောင် လက်စွမ်းကျဆင်းသွားခဲ့ပြီး လိဂ် ၂၅ ပွဲမှာ ၃၄ဂိုးအထိ ပေးခဲ့ရပါတယ်။
ဒါဟာ နောက်ဆုံး ၈ နှစ်အတွင်း ဆီမြွန်နီ ပျိုးထောင်ခဲ့တဲ့ ခံစစ်အတောင့်တင်းဆုံး အသင်းအတွက် အံ့အားသင့်စရာ ကျဆင်းမှု ဖြစ်ခဲ့ပါတယ်။ ဒါကြောင့်လည်း အာဂျင်တိုင်း နည်းပြအနေနဲ့ မကြာခင်မှာ မက်ဒရစ်ကနေ ထွက်ခွာမှာလားဆိုတဲ့ ဆွေးနွေးစရာတွေလည်း ထွက်ပေါ်နေခဲ့တာပဲ ဖြစ်ပါတယ်။